२५ हजारभन्दा बढीले दसैँमा पाथीभरामा दर्शन गरे

फुङ्लिङ (ताप्लेजुङ) । दसैँको समयमा २५ हजारभन्दा बढी भक्तजनले ताप्लेजुङस्थित प्रसिद्ध तीर्थस्थल पाथीभरामा दर्शन गरेका छन् । नवरात्रदेखि कोजाग्रत पूर्णिमासम्ममा २५ हजार छ सय ३८ जान भक्तजनले पाथीभरा मन्दिरमा पुगेर पूजापाठ गरेको पाथीभरा क्षेत्र विकास समितिले जनाएको छ ।

विगतदेखिकै परम्पराअनुसार नवरात्रयता पाथीभरामा भक्तजनको उल्लेख्य आगमन भएको पाथीभरा क्षेत्र विकास समितिले जनाएको छ । नवरात्रपछि दैनिक हजारौँ सङ्ख्यामा भक्तजनले पाथीभराको दर्शन गरिरहेको समितिका कर्मचारी राजेन्द्र महतले जानकारी दिए ।

उनका अनुसार नेपाल बाहिर भारतको सिक्किम र दार्जिलिङ क्षेत्रबाट पनि केही भक्तजन पाथीभराको दर्शन गर्न आएको समितिले जनाएको छ । सङ्घीय राजधानी काठमाडौँलगायत अधिकांश जिल्लाबाट पाथीभरा दर्शन गर्न भक्तजनहरु आएका छन् ।