कोशी प्रदेश नामकरणकै कारण अशान्त

काठमाडौं । पहिचान कि भूगोलका आधारमा भन्ने विवादका कारण नाम राख्न नसकेको प्रदेश अहिले नामकरणकै कारण अशान्त छ । सरकार र आन्दोलनरत पक्षको मनोविज्ञानलाई नियाल्दा अब न त सजिलै प्रदेशसभाबाट पारित भइसकेको नाम परिवर्तन हुने देखिन्छ, न आन्दोलनकारी पक्षले ‘कोशी’ नाममा सहमति जनाउने सम्भावना छ ।

१७ फागुनमा प्रदेश नामकरण भएदेखि पहिचान पक्षधर संघसंस्थाहरूले सुरु गरेको आन्दोलन माध्यमिक शिक्षा परीक्षा (एसईई) का कारण हाल स्थगन छ । नामकरण फिर्ता लिन १० वैशाखसम्मको अल्टिमेटम दिएर आन्दोलनरत पक्षले प्रदेशसभा अध्यक्ष र मुख्यमन्त्रीलाई ज्ञापनपत्र बुझाएका छन् ।

दैनिकजसो विरोध र आन्दोलनका कार्यक्रमहरू भइरहँदा प्रदेश राजधानी विराटनगरसँगै पूर्वी तराईका शहरहरू धरान, इटहरी, दमक, बिर्तामोड, र काकडभिट्टामा समेत प्रदर्शन भए । त्यसले पूर्वी पहाडका धेरै बजार क्षेत्रको जनजीवन नै प्रभावित बन्न पुगेको थियो ।

किरात, लिम्बुवान, खम्बुवान, कोचिला लगायतका विभिन्न नाम हुनुपर्ने मागसहित आन्दोलन गरिरहेका विभिन्न समूहहरू समेत अहिले एउटै छातामुनि बसेर आन्दोलन गरिरहेका छन् ।