ऊर्जा क्षेत्रको विकासका लागि परिसंघ र इप्पान मिलेर अघि बढ्ने

ऊर्जा क्षेत्रको विकासका लागि मिलेर अगाडि बढ्न नेपाल उद्योग परिसंघ र स्वतन्त्र ऊर्जा उत्पादकहरूको संस्था नेपाल (इप्पान)ले ऐक्यबद्धता जनाएका छन् । परिसंघ सचिवालयमा भएको भेटमा परिसंघ र इप्पानले ऊर्जा क्षेत्रको विकास एवम् समस्या समाधानका लागि सहकार्य गर्ने ऐक्यबद्धता व्यक्त गरेका हुन् ।

कार्यक्रममा परिसंघका अध्यक्ष राजेशकुमार अग्रवालले ऊर्जा क्षेत्र विदेशी मुद्रा आर्जन गर्ने दिगो माध्यम रहेको बताए । उनले ऊर्जा क्षेत्रको समग्र विकास, नीतिगत सुधारका लागि सहकार्य गरेर अगाडि बढ्नुपर्ने बताए । यस्तै, उनले पीपीए खुला गरिनुपर्ने, नेपाल विद्युत् प्राधिकरणको पुनर्संरचना गरिनुपर्नेमा जोड दिए ।

इप्पानका अध्यक्ष गणेश कार्कीले ऊर्जा क्षेत्रको विकासका लागि ऊर्जा संकटकाल घोषणा गर्न सरकारलाई सुझाव दिएको बताए । ऊर्जा क्षेत्रको सन्दर्भमा निजी क्षेत्रको सुझावमा एकरूपता हुनुपर्नेमा पनि उनले जोड दिए । निजी क्षेत्रलाई आन्तरिक एवम् बाह्य क्षेत्रमा विद्युत् व्यापार गर्न दिनुपर्ने, विद्युत् निर्यातका लागि सीमा क्षेत्रसम्म प्रसारणलाइन निर्माण हुनुपर्ने, उद्योगीहरूले आवश्यक बिजुली पाउनुपर्नेलगायतका विषयमा सरकारको ध्यानाकर्षण गराउँदै आएको उनले बताए ।