कुनै नीतिगत ग्यारेन्टीविना जबर्जस्ती बढ्यो सेयरबजार

काठमाडौं । सेयरबजार सुधारका लागि कुनै नीतिगत व्यवस्था नभए पनि बुधबार बजार सामान्य अंकले बढेको छ । चार दिनसम्म लगातार घटेपछि सेयरबजारले बुधबार सामान्य रुपमा रङ फेरेको हो । नेपाली कांग्रेसका नेता अर्थमन्त्री बनेपछि सेयरबजार बढ्नैपर्छ भनेर लाग्नेहरुले बुधबार जबर्जस्ती बजार बढाएको देखिन्छ ।

बुधबार सेयरबजार परिसूचक नेप्से आठ दशमलव तीन नौ अंकले बढेर एक हजार आठ सय ७५ दशमलव शून्य सात विन्दुमा बन्द भयो । यद्यपि कारोबार रकम एक अर्ब रुपैयाँ पनि पुग्न सकेन । यदि नीतिगत सुधारपछि बजार उत्साहजनक रुपमा बढेको थियो भने कारोबार रकममा पनि उल्लेख्य वृद्धि हुने थियो । हरियाली र कारोबार अंकले नै प्रस्ट पारेको छ कि बुधबारको बजार वृद्धिमा कुनै नीतिगत कारण छैन ।

यद्यपि बुधबार सेन्सिटिभ परिसूचक एक दशमलव नौ सात अंकले बढेर तीन सय ५३ दशमलव नौ पाँच विन्दुमा पुग्यो । साधारण सेयरको कारोबार मापन गर्ने फ्लोट सूचक शून्य दशमलव छ चार अंकले बढेर एक सय ३१ दशमलव छ चार विन्दुमा बन्द भएको छ । सेन्सिटिभ फ्लोट सूचक पनि शून्य दशमलव छ चार अंकले बढेर एक सय १७ दशमलव छ चार विन्दुमा बन्द भएको छ ।

अर्थमन्त्री डा. प्रकाशशरण महतको नियुक्तिपछि बजार पहिलोपटक बढेको छ । उनको नियुक्तिपछि लगातार तीन दिन बजार घट्दा लगानीकर्ताले नयाँ अर्थमन्त्रीलाई विश्वास गर्न नसकेको रुपमा विश्लेषण गरिएको थियो ।

बुधबार ८१ करोड ६० लाख रुपैयाँबराबरको २६ लाख दुई हजार नौ सय ५६ कित्ता मात्र सेयर किनबेच भएको छ । कारोबारमा आएका दुई सय १७ कम्पनीमध्ये एक सय ४६ वटाको सेयरमूल्य बढेको छ । ६४ वटाको घटेको छ भने सात वटाको स्थिर रहेको छ ।

यस्तै १३ उपसमूहमध्ये १० वटाले बजारलाई बढाएका हुन् । त्यसमध्ये होटल तथा पर्यटन क्षेत्रले नेतृत्व गरेको छ । पछिल्लो समय बाह्य पर्यटकको आगमन बढेको समाचार आएपछि यस क्षेत्रमा लगानीकर्ता आकर्षित भएका हुनसक्छन् । त्यसैले बुधबार होटल समूह एक दशमलव शून्य चार प्रतिशतले बढ्यो । त्यसपछि सबैभन्दा धेरै बढ्नेमा लघुवित्त समूह छ । जसको सेयर मूल्य शून्य दशमलव आठ सात प्रतिशतले बढेको छ । यसबाहेक म्युचुअल फण्ड शून्य दशमलव छ आठ, बैंकिङ शून्य दशमलव छ पाँच, लगानी शून्य दशमलव छ, जलविद्युत् शून्य दशमलव चार एक, वित्त शून्य दशमलव चार, जीवन बीमा शून्य दशमलव तीन एक, अन्य शून्य दशमलव दुई सात र विकास बैंक शून्य दशमलव एक एक प्रतिशतले बढेका छन् ।

बजार सकारात्मक भए पनि उत्पादन तथा प्रशोधन, निर्जीवन बीमा र व्यापार समूह घटेका छन् । कारोबार सुरु भएको दश मिनेटपछि घट्न थालेको बजार अधिकांश समय ऋणात्मक रह्यो । तर अन्तिम एक घण्टा सम्हालिँदा बजार हरियो भएर बन्द भएको हो ।

यसदिन पनि कालिञ्चोक दर्शन लिमिटेडको सेयर कारोबार सकारात्मक सर्किट लेभलमा भएको छ । यो कम्पनीको सेयर मूल्य नौ दशमलव नौ सात प्रतिशतले बढेर बन्द भएको छ । न्यादी हाइड्रोपावरका सेयरधनीले सर्वाधिक चार दशमलव पाँच आठ प्रतिशतले गुमाएका छन् ।

सबैभन्दा धेरै कारोबार शिवम् सिमेन्टको छ करोड ४३ लाख रुपैयाँबराबरको सेयर किनबेच भएको छ । त्यसपछि नबिल बैंकको दुई करोड ३५ लाख रुपैयाँबराबरको कारोबार भएको छ । यस दिन लगानीकर्ताको सम्पत्ति १२ अर्ब रुपैयाँले बढेको छ । बजार पुँजीकरण २७ खर्ब १६ अर्ब रुपैयाँ कायम भएको छ ।