सेयरबजारका ५५ लाख बढी लगानीकर्ता मारमा

काठमाडौं । सेयरबजार परिसूचक निरन्तररुपमा ओरालो लाग्दा ५५ लाख बढी लगानीकर्ता मर्माहत भएका छन् । सेयर लगानीकर्ताहरुको संगठनका तर्फबाट नेपाल इन्भेष्टर्स फोरमका अध्यक्ष तुलसीराम ढकाल, सेयर लगानीकर्ता संघ नेपालका अध्यक्ष तारा प्रसाद फुल्लेल र नेपाल पुँजीबजार लगानीकर्ता संघका सुदूरपश्चिम संयोजक कुमार थापाले सोमबार नेपाल धितोपत्र बोर्डका अध्यक्ष रमेश कुमार हमालसँग भेट गरी गुनासो पोखेका हुन् ।

भेटका क्रममा १० बुँदे माग अघि सार्र्दै उनीहरुले भने, ‘पुँजीबजारको इतिहासमा सबैभन्दा बढी अर्थात् पुँजीकृत रकम १५ खर्ब रुपैयाँ गुमाइसक्दा पनि सम्बन्धित पक्ष मौन रहँदा ५५ लाखभन्दा बढी लगानीकर्ताहरु मर्माहत भएका छन् ।’ उनीहरुले बोर्डले गरेको नयाँ ब्रोकर लाइसेन्सको निर्णय स्वागतयोग्य भएको भन्दै ब्रोकर कमिसन शून्य दशमलव १५ प्रतिशतमा कायम गर्न समेत माग गरेका छन् । ‘लगानीकर्ताहरुको बढ्दो सेयर खरिदबिक्री लागतलाई न्यूनीकरण गर्न हाल रहेको महँगो ब्रोकर कमिसन तिर्दै आएकोमा बढीमा शून्य दशमलव १५ प्रतिशतबाट नबढ्ने गरी कमिसन दर कायम गरियोस्’, उनीहरुले भनेका छन् । यसैगरी उनीहरुले बोर्डका अध्यक्ष हमालसमक्ष दीर्घकालीन लगानीकर्ता र अल्पकालीन लगानीकर्ताहरुको वर्गीकरण गरी दीर्घकालको लागि तीन प्रतिशत र अल्पकालको लागि पाँच प्रतिशत पुँजीगत लाभकर कायम गर्न पनि माग गरेका छन् ।

लगानीकर्ताहरुले डीपी चार्ज रकम २५ रुपैयाँ कायम भइरहेको अवस्थामा उक्त रकम पुनरवलोकन गरी बढीमा पाँच रुपैयाँ कायम गर्न पनि माग गरेका छन् । यसैगरी दोस्रो बजारमा हुने अस्वाभाविक उतारचढावलाई न्यूनीकरण गर्नको लागि मार्केट मेकर, मार्केट डिलर, धितोपत्र व्यापारी तथा संख्यागत लगानीकर्ताहरुको छिटोभन्दा छिटो बजार प्रवेशको वातावरण मिलाउन पनि लगानीकर्ताहरुले माग गरेका छन् । यीबाहेक अप्सन ट्रेडिङ, फ्युचर मार्केट, इन्ट्रा डे मार्केट र सर्ट सेलको कारोबार तत्काल गर्ने व्यवस्थाको माग पनि लगानीकर्ताहरुले गरेका छन् । लगानीकर्ताहरुले केवाईसी डिजिटल सुरु गरी भौतिक केवाईसी अन्त्य गर्न, ब्रोकर कम्पनीमार्फत सुरु गर्ने भनिएको मार्जिन लेण्डिङको व्यवस्था अविलम्ब सुरु गर्न, नेपाल राष्ट्र बैंकले ल्याएको सेयर कर्जाको सीमा १२ करोड रुपैयाँ लागू गरिएकोमा उक्त १२ करोडको नीतिलाई तत्काल खारेजी गर्न विशेष पहल गर्न र नेपाल राष्ट्र बैंकले ल्याएको सेयर कर्जाको भारित औसत दर एक सय प्रतिशत नै कायम गर्न विशेष पहल गर्न पनि बोर्डका अध्यक्ष हमालसँग माग गरेका छन् ।