पुँजीगत लाभकर घटाउन माग

काठमाडौं । सेयर लगानीकर्ताहरूले बुधबार प्रधानमन्त्री पुष्पकमल दाहाल ‘प्रचण्ड’लाई भेटेर सेयर कारोबारमा पुँजीगत लाभकरको दर घटाउन माग गरेका छन् । लगानीकर्ताले सेयरबजारबारे अहिलेको स्थिति अवगत गराउँदै आफ्ना मागहरू पूरा गर्न भनेका हुन् ।

लगानीकर्ताले सेयर धितो कर्जामा लगाइएको १२ करोडको क्यापले बजार निरुत्साहित गरेको भन्दै फिर्ता लिइदिन माग गरेका छन् । यस्तै सेयर कर्जामा लगाइएकोे एक सय ५० प्रतिशत जोखिम भारित औसतलाई एक सय प्रतिशतमा कायम गरिदिन पनि आग्रह गरेका छन् ।

उनीहरूले सेयरबजारमा अल्पकालीन लगानीकर्तालाई पाँच प्रतिशत र दीर्घकालीन लगानीकर्तालाई तीन प्रतिशत पुँजीगत लाभकर लगाउने व्यवस्था गर्न समेत माग गरेका छन् । नयाँ ब्रोकर, स्टक एक्सचेन्ज र कमोडिटिज एक्सचेन्जको नयाँ लाइसेन्स वितरण प्रक्रियामा ढिलाइ नगर्न पनि सेयर लगानीकर्ताले माग गरेका छन् ।

यसबाहेक विद्यमान ब्याजदर उच्च हुनगई लगानी निरुत्साहित भएकाले ब्याजदरमा पुनरावलोकन गरी एकल अंक कायम गर्न, तरलता समस्याले देशको अर्थतन्त्र नकाकरात्मक भएको हुँदा तत्काल समस्या समाधान गर्ने व्यवस्था गर्न माग गरेका छन् ।