अन्तत : ५३ बिन्दुले उक्लियो सेयर बजार

काठमाडौं । साताको सुरुवाती कारोबार दिन आईतबार नै सेयर बजार परिसुचक उकालो लागेको छ । पुँजीगत लाभकरको बिषयमा लगानीकर्ताहरुले गरेको आन्दोलनका कारण आज कारोबार खुलेको पहिलो केही समय सेयर बजार अवरुद्ध भएको थियो । लगानीकर्ताहरुको समुहले ब्रोकर कम्पनीहरुको टिएमएस बन्द गरिदिएका थिए ।

सरकारका अर्थ सम्वन्धी प्रस्तावलाई कार्यान्वयन गर्ने बिधेयक, २०८० जारी भएपनि उक्त बिधेयकका केही दफाहरुलाई लिएर लगानीकर्ताहरु आन्दोलतमा उत्रिएका थिए । त्यही लगानीकर्ताहरुको समुहले आईतबार बिभिन्न ब्रोकर कम्पनीहरुको कार्यालयमा गई टिएमएस बन्द गरिदिएपछि केही समय सेयर कारोबार अवरुद्ध भएको थियो । त्यसको लगत्तै अर्थमन्त्रालयको राजश्व व्यवस्थापन महाशाखाले अहिले तिर्दे आएको पाँच र सात दशमलव पाँच प्रतिशत पुँजीगत लाभकर नैं अन्तिम हुने प्रष्टीकरण दिएको थियो ।

उक्त प्रष्टीकरण संगै लगानीकर्ताहरु उत्साहित भएका थिए । जसले गर्दा साताको पहिलो कारोबार दिन आज आईतबार बजार परिसुचक ५३ दशमलव शुन्य तीन अंकले उकालो लागेर १९ सय १९ दशमलव ३७ बिन्दुमा पुग्न सफल भयो । यसैगरी क बर्गका कम्पनीहरुको कारोबार मापन गर्ने सेन्सिटिभ इन्डेक्स पनि नौं दशमलव ४९ अंंकले उकालो लागेर तीन सय ६५ दशमलव १० बिन्दुमा कायम रहन सफल भयो ।

नेपाल स्टक एक्सचेन्ज लिमिटेड (नेप्से) मा आज १३ वटा उपसमुहहरु अन्तर्गत दुई सय ७० वटा कम्पनीहरुको ३१ हजार दुई सय ५२ पटक सेयर किनबेच भएको छ । जसबाट ४५ लाख ५७ हजार एक सय ६९ कित्ता सेयर खरिद बिक्री हुँदा कुल कुल कारोबार रकम एक अर्ब ६५ करोड ६३ लाख ४० हजार तीन सय ९१ रुपैंयाँ कायम भएको छ ।

आज सबै किसिमका गरी १३ वटा उपसमुमहरुको सेयर कारोबार भएकाछन् । जसअन्तर्गत बाँणिज्य बैंक, बिकास बैंक, जलबिद्युत, जीवन बीमा, निर्जिवन बीमा सहितका सबै समुहहरुको सुचक बढेर नेप्सेमा पुरै हरियाली छाएको छ ।