चार भारतीय नागरिक ३२ थान मोबाइलसहित पक्राउ

नेपालगञ्ज । ३२ थान मोबाइलसहित चार भारतीय नागरिक बाँकेको नेपालगञ्ज विमानस्थलबाट पक्राउ परेका छन् ।

भारतको मध्यप्रदेशका उनीहरु जहाजमा काठमाडौँ जाने तयारीमा रहेका बखत ३२ थान मोबाइलसहित विमानस्थलबाट पक्राउ गरिएको जिल्ला प्रहरी कार्यालय, बाँकेका प्रहरी नायब उपरीक्षक नारायण डाँगीले जानकारी दिए । उनका अनुसार पक्राउ पर्नेमा अमित सोलङ्की, सचिव कुकरेजा, कमल बन्सारी र अर्का अमित रहेका छन् ।

प्रहरीले चोरीको मोबाइल काठमाडौँमा बेच्न लैजान लागेको शङ्का गरेको छ । उनीहरुले सेकेन्ड हेण्ड मोबाइल बनाउन काठमाडौँ जान लागेको प्रहरीलाई बताएका छन् । भिभो, अपो, रेडमी, सामसुङ लगायतका कम्पनीको मोबाइल प्रहरीले बरामद गरेको हो । उनीहरु सबैलाई भन्सार पठाउने तयारी गरिएको प्रनाउ डाँगीले बताएका छन् ।