कान्ती देवीको हत्यामा संलग्न तीन अभियुक्त पक्राउ

पर्सा । जगरनाथपुर गाउँपालिका–५ मसिहानी टोल बस्ने ५६ वर्षीया कान्ती देवी वीनको हत्या अभियोगमा संलग्न तीन जनालाई प्रहरीले पक्राउ गरेको छ । पक्राउ पर्नेमा पर्सा जगरनाथपुर गाउँपालिका बस्ने ३६ वर्षीय भुट्टा भनिने लालबाबु राउत वीन तथा मृतकका जेठाजुहरू सोही ठाउँ बस्ने ५९ वर्षीय चन्द्रिका राउत वीन र ५७ वर्षीय अमिका भनिने अमीरीका राउत वीन रहेका छन् ।

गत असोज २ गते दिउँसो आफ्नै घरभित्र घाँटी रेटी हत्या भएको अवस्थामा कान्ती देवीको शव फेला परेको घटनाको अनुसन्धानको क्रममा जिल्ला प्रहरी कार्यालय पर्साबाट खटिएको प्रहरीले लालबाबु राउतलाई असोज ७ गते पक्राउ गरेको थियो । थप सोधपुछ एवम् अनुसन्धानको क्रममा चन्द्रिका राउत र अमीरीका राउत समेतको संलग्नता रहेको खुल्न आएपछि उनीहरूलाई आइतबार प्रहरीले पक्राउ गरेको हो ।

कान्ती देवीको घरमा चोरी गर्ने योजनाका साथ असोज १ गते राति सुरूङ बनाइ(सेनकाटी) घरभित्र प्रवेश गरेर चोरी गर्नको लागि बक्साहरू खोतिल्दै गरेको अवस्थामा कान्ती देवी बिउँझेकी थिइन । उनीहरूलाई चिनेपछि पोल खुल्ने डरले कान्ती देवीलाई खुर्पीले घाँटी रेटी हत्या गरेको अनुसन्धानका क्रममा खुलेको छ । उनीहरूविरुद्ध जिल्ला अदालतबाट म्याद थप अनुमति लिई प्रहरीले थप अनुसन्धान गरिरहेको जनाएको छ ।