अख्तियारको कर्मचारी भन्दै ठगी गर्ने व्यक्ति पक्राउ

बाँके । अख्तियार दुरुपयोग अनुसन्धान आयोगको कर्मचारी हुँ भन्दै ठगि गर्दै हिड्ने एक व्यक्ति पक्राउ परेका छन् । जिल्ला प्रहरी कार्यालय बाँकेले आफूलाई अख्तियारको कर्मचारी भन्दै ठगी गरी हिड्ने नेपालगञ्ज उपमहानगरपालिका बस्ने मोहन कोइरालालाई पक्राउ गरेको हो ।

चितवन जिल्ला भरतपुर महानगरपालिका घर भई हाल नेपालगञ्ज बस्ने कोइरालालाई बाँके प्रहरीले ठगी गरेको अभियोगमा पक्राउ गरिएको जिल्ला प्रहरी कार्यालय बाँकेका प्रवक्ता प्रहरी नायब उपरीक्षक नारायण डाँगीले बताए । उनका अनुसार विगत केही समयदेखि उनले बाँके जिल्लाका विभिन्न सरकारी कार्यालय तथा संघसंस्थामा पुगेर आफू अख्तियारको कर्मचारी हुँ भन्दै ठग्ने र लाभ लिने गरेको सूचनाका आधारमा निजलाई पक्राउ गरिएको हो ।

अख्तियार दुरुपयोग अनुसन्धान आयोग बुटवल, सम्पर्क कार्यालय नेपालगञ्ज तथा जिल्ला प्रहरी कार्यालय बाँकेबाट खटिएको प्रहरी टोलीले निगरानी एवं खोजतलास गरी कोइरालालाई पक्राउ गरेको जनाएको छ ।

प्रवक्ता डाँगीले निज कोइरालालाई हाल हिरासतमा राखी अनुसन्धान सुरु गरिएको जानकारी दिँदै उनीबाट कोही व्यक्ति ठगिएको भए जिल्ला प्रहरी कार्यालय बाँकेमा उजुरी दिन अनुरोध गरिएको बताए ।