कुवेत पठाईदिन्छु भनी रकम ठगी गर्ने व्यक्ति पक्राउ

काठमाडौं । वैदेशिक रोजगारीको लागि कुवेत पठाईदिन्छु भन्दै ठगी गर्ने एक ३३ वर्षीय युवा पक्राउ परेका छन् । पाल्पास्थित रब्दिकोट नगरपालिका घर भई हाल काठमाडौंस्थित बसुन्धारा बस्ने चक्र पोखरेल गत शुक्रबार पक्राउ परेका हुन् ।

उनले दिपेश तामाङलाई कुवेत पठाईदिन्छु त्यसको लागि प्रतिव्यक्ति दुई लाख रुपैयाँ लाग्छ भनि एक लाख लिई सम्पर्कविहीन भएका थिए । पोखरेलले कुवेत पुगेपछि प्रतिष्ठित कम्पनीमा काम लगाइदिन्छु, त्यहाँ मासिक ६० हजार रुपैयाँ तलब हुन्छ भनी विश्वास दिलाई प्रलोभनमा पारी पीडित तामाङसँग पटकपटक गरी एक लाख रुपैयाँ रकम लिएका थिए ।

पैसा लिएपछि सम्पर्कविहीन भई ठगी गरेकाले काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले पोखरेलको खोजतलास गर्ने क्रममा शुक्रबार साँझ पक्राउ गरेको हो । प्रहरीले उनलाई थप अनुसन्धान तथा कारवाहीको लागि वैदेशिक रोजगार विभाग ताहाचल पठाइएको जनाएको छ ।