आठ लाख भारतीय रूपैयाँसहित दुई भारतीय नागरिक बिमानस्थलबाट पक्राउ

काठमाडौं । अवैध रूपमा बाह्य मुलुकतर्फ लैजान लागेको विभिन्न दरका गरी आठ लाख भारतीय रूपैयाँसहित दुई जना भारतीय नागरिक पक्राउ परेका छन् । त्रिभुवन अन्तर्राष्ट्रिय बिमानस्थलबाट बिसतारा एयरको उडानद्वारा दिल्ली जान लागेका ३५ वर्षीय धर्मेद्र नागर र ४२ वर्षीय पंकज गुप्तालाई बिहीबार दिउँसो प्रहरीले पक्राउ गरेको हो ।

उनीहरूलाई अन्तर्राष्ट्रिय उडान तर्फको प्रस्थान ह्याण्ड व्यागेज चेकिङ एरियामा जाँच गर्ने क्रममा धर्मेद्र नागरलाई पाँच सय दरका सात सय ५७ थान, दुई सय दरका दुई सय ३० थाम र एक सय दरका ६ सय ७० थान गरी चार लाख ९१ हजार पाँच सय भारतीय रुपैयाँ र पंकज गुप्तालाई पाँच सय दरका ६ सय १७ थान गरी तीन लाख आठ हजार पाँच सय भारतीय रूपैयाँसहित फेला पारी पक्राउ गरेको हो ।

प्रहरीका अनुसार उनीहरूलाई आवश्यक अनुसन्धानको लागि राजश्व अनुसन्धान विभाग हरिहरभवन पुल्चोक ललितपुर पठाइएको छ ।