भरूवा बन्दुकको छर्रा लागेर दोलखाका एक युवाको मृत्यु

दोलखा । दोलखाको तामाकोशी गाउँपालिका–२ झुलेस्थित डाँडावारी जम्बोटे जंगलमा भरुवा बन्दुकको छर्रा लागेर सोही ठाउँ बस्ने एक युवाको मृत्यु भएको छ । प्रहरीका अनुसार जंगलमा सिकार खेल्न गएका २० वर्षीय सन्जीब सार्कीको भरूवा बन्दुकको छर्रा लागेर मृत्यु भएको हो ।

सन्जीब समेत गरी सात जना शनिबार राति सिकार खेल्न जंगल गएका थिए । सन्जिबले बोकेको भरुवा बन्दुकको काठको बट भाँचिई फायर हुँदा छर्राले लागेर सन्जीब घाइते भएका थिए । घाइते भएपछि उनलाई तामाकोशी अस्पताल दोलखामा सामान्य उपचारपश्चात थप उपचारको लागि पशुपती चौलागाँई स्मृति अस्पताल चरिकोट लगिएको थियो । उनको चरिकोट अस्पतालमा आइतबार बिहान मृत्यु भएको हो । उक्त खबर प्राप्त हुनासाथ खटिएको प्रहरीले सिकार खेल्न गएका अन्य ६ जनालाई नियन्त्रणमा लिई घटना सम्बन्धमा आवश्यक अनुसन्धान गरिरहेको जनाएको छ ।