त्रिभुवन अन्तर्राष्ट्रिय विमानस्थलबाट बरामद सुन २४ क्यारेटको भएको पुष्टि

काठमाडौं । भन्सार कार्यालयले बिहीबार राति त्रिभुवन अन्तर्राष्ट्रिय विमानस्थलबाट बरामद सुन २४ क्यारेटको रहेको पुष्टि भएको जनाएको छ । आज(शुक्रबार) भन्सार विभागमा गरिएको परीक्षणमा विमानस्थलबाट बरामद गरेको १४ किलो सुन २४ क्यारेटको रहेको पुष्टि भएको हो ।

उक्त सुनसहित बिहीबार राति दुई जनालाई पक्राउ गरिएको थियो । उक्त सुन गोरखाका चन्द्र बहादुर घलेले बिस्कुट आकारमा प्लाष्टिकले कभर गरेर ल्याएका थिए । फ्लाई दुबईको उडानमार्फत् बिहीबार राति काठमाडौं उत्रिएका उनलाई भन्सारको टोलीले पक्राउ गरेको थियो । घले पक्राउ परेपछि उनको कल डिटेल लगायतको परीक्षणपछि बिहीबार राति नै गोरखा घर भएका मिनबहादुर घलेसमेत पक्रउ परेका थिए ।