जुत्तामा लुकाई ल्याएको सुनसहित दुई जना पक्राउ

मकवानपुर । हेटौंडा उपमहानगरपालिका–१५ रातोमाटेस्थित चेक प्वाइन्टबाट सुनजस्तो देखिने धातुसहित दुई जनालाई प्रहरीले पक्राउ गरेको छ । धनुषा बस्ने ३९ वर्षीय हितेस कुमार साह र भारत पंजाबका ३४ वर्षीय तर्सिम सिङलाई करिब चार सय ९० ग्राम सुनजस्तो देखिने धातुसहित आज(शुक्रबार) बिहान प्रहरीले पक्राउ गरेको हो ।

उक्त चेकप्वाइन्टमा सवारीसाधन जाँच गर्ने क्रममा वीरगंजबाट आउँदै गरेको बा.प्र ०३–००१ ख १७२७ नम्बरको बसमा सवार साहलाई जुत्ताभित्र लुकाई ल्याएको करिब चार सय ५० ग्रामको सुनजस्तो देखिने धातुको ब्रास्लेट नौ थान र ना.५ ख ६२१७ नम्बरको बसमा सवार सिङलाई झोलाभित्र लुकाई ल्याएको करिब ४० ग्राम सुनजस्तो देखिने धातुसहित फेला पारी प्रहरीले पक्राउ गरेको हो । यस सम्बन्धमा प्रहरीले थप अनुसन्धान गरिरहेको जनाएको छ ।