स्रोत नखुलेको करिब २० लाखसहित एक जना पक्राउ

मोरङ । स्रोत नखुलेको करिब २० लाख रकमसहित एक व्यक्ति पक्राउ परेका छन् । बिराटनगर महानगरपालिका–६ केशलिया मार्गबाट स्रोत नखुलेको नगद १९ लाख ९० हजार रूपैयाँसहित ४९ वर्षीय सुरेन्द्र प्रसाद साहलाई बुधबार साँझ प्रहरीले पक्राउ गरेको हो ।

जिल्ला प्रहरी कार्यालय मोरङबाट खटिएको प्रहरीले सुनसरी देवानगंज गाउँपालिका बस्ने साहलाई विराटनगरबाट पक्राउ गरेको हो । प्रहरीले को.७ प ५२२१ नम्बरको मोटरसाइकललाई जाँच गर्ने क्रममा चालक साहलाई उक्त नगदसहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको जनाएको छ ।