ज्यान मार्ने धम्की दिई रकम माग्ने व्यक्ति पक्राउ

रौतहट । ज्यान मार्ने धम्की दिई रकम मागेको अभियोगमा फतुवा बिजयपुर नगरपालिका–८ बस्ने ३५ वर्षीय श्रीभगवान साहलाई प्रहरीले पक्राउ गरेको छ । एक व्यापारीलाई पटक पटक फोन गरी उनी र उनका छोरा छोरीलाई ज्यान मार्ने धम्की दिई पाँच लाखदेखि ५० लाख रूपैयाँसम्म रकम माग गरेका साह पक्राउ परेका हुन् ।

उक्त कार्यमा संलग्न साहलाई सूचनाको आधारमा जिल्ला प्रहरी कार्यालय रौतहटबाट खटिएको प्रहरीले पक्राउ गरेको हो । साथै, प्रहरीले सोही घटनामा संलग्न अन्य व्यक्तिहरुको खोजी गरिरहेको छ । उनी उपर आपराधिक लाभ (एक्सटर्सन)सम्बन्धी कसूरमा प्रहरीले आवश्यक अनुसन्धान गरिरहेको जनाएको छ ।