नेपाली हजारका नक्कली नोटसहित एक जना पक्राउ

रौतहट । एक हजार थानभन्दा बढी नक्कली हजारका नेपाली नोटसहित एक जना पक्राउ परेका छन् । देवाही गोनाही नगरपालिका–८ पटेल चोकबाट नक्कली जस्तो देखिने नेपाली नोट एक हजार दरको एक हजार आठ सय ४३ थानसहित गुजरा नगरपालिका हरिहरपुर बस्ने २५ वर्षीय संदिप यादवलाई बिहीबार साँझ प्रहरीले पक्राउ गरेको हो ।

ईलाका प्रहरी कार्यालय देवाही गोनाहीबाट खटिएको प्रहरीले उनलाई उक्त नक्कली नोट, विभिन्न बैंकको एटिएम कार्ड पाँच थान र १६ लाख ६५ हजार रूपैयाँ उल्लेख भएको चेक तीन थानसहित पक्राउ गरेको हो । यस सम्बन्धमा प्रहरीले थप अनुसन्धान गरिरहेको जनाएको छ ।