स्रोत नखुलेको पाँच लाखबढी भारतीय रूपैयाँसहित एक युवा पक्राउ

सप्तरी । स्रोत नखुलेको भारतीय पाँच लाख रुपैयाँभन्दा बढी रकमसहित एक युवा राजगढ गाउँपालिका–२ झौरा चोकबाट पक्राउ परेका छन् । स्रोत नखुलेको पाँच लाख २९ हजार नौ सय ७० भारतीय रूपैयाँसहित भारत भरफोर ग्राम पन्चायत सुब्बा टोल मधुवनी–३ बस्ने २५ वर्षीय संजय कुमारलाई शुक्रबार दिउँसो प्रहरीले पक्राउ गरेको हो ।

जिल्ला प्रहरी कार्यालय सप्तरीबाट खटिएको प्रहरीले बिआर ५० बि १५४२ नम्बरको मोटरसाइकल जाँच गर्ने क्रममा मोटरसाइकलको डिक्कीमा लुकाई राखेको उक्त भारतीय रूपैयाँसहित चालक संजयलाई पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको जनाएको छ ।