कास्की प्रहरीद्वारा पुसमा ७७ जना फरार प्रतिवादी पक्राउ

पोखरा । जिल्ला प्रहरी कार्यालय कास्कीले पुस महिनामा मात्रै विभिन्न मुद्दामा अदालतको फैसला बमोजिम फरार रहेका ७७ जना प्रतिवादी पक्राउ गरेको छ । अदालतबाट विभिन्न मुद्दामा फैसला भइ कैद तथा जरिवाना भुक्तान गर्न बाँकी ७७ जना फरार प्रतिवादीलाई पक्राउ गरी सम्मानित अदालतमा बुझाइएको कास्की प्रहरीका सूचना अधिकारी प्रहरी नायव उपरीक्षक (डिएसपी) श्रवणकुमार विकले जानकारी दिए ।

पक्राउ परेकाहरुबाट तीन लाख तीन हजार सात सय ५ रुपैयाँ जरिवाना पनि लिइएको छ । पक्राउ पर्नेहरुमा चेक अनादारसम्बन्धी मुद्दामा ४४ जना, सार्वजनिक स्थानमा अभद्र व्यवहारसम्बन्धी मुद्दामा तीन जना, जालसाझी मुद्दामा तीन जना, लागू औषधसम्बन्धी मुद्दामा १३ जना, अभद्र व्यवहारसम्बन्धी मुद्दामा एक जना, झुट्टा विवरण पेश गरी नागरिकता लिएको मुद्दामा एक जना, जुवातास मुद्दामा तीन जना, सार्वजनिक अपराधसम्बन्धी मुद्दामा एक जना, दोहोरो नागरिकता लिएको सम्बन्धी मुद्दामा दुई जना पक्राउ परेका छन् ।

यसैगरी, ज्यानसम्बन्धी मुद्दामा एक जना, सवारी ज्यान मुद्दामा एक जना, गैरकानूनी कारोवारसम्बन्धी मुद्दामा एक जना, अपुतालि हक कायमसम्बन्धी मुद्दामा एक जना र लेनदेन (बिगो सम्बन्धी) मुद्दामा दुई जना पक्राउ गरेको डिएसपी विकले बताए ।