गुणस्तरहिन नक्कली मदिरा उत्पादन गरी कालोबजारी गर्ने नौ जना पक्राउ

काठमाडौं । काठमाडौं उपत्यकामा स्वदेशी तथा विदेशी ब्राण्डका गुणस्तरहिन नक्कली मदिराहरू उत्पादन गरी कालोबजारी गरेको अभियोगमा नौ जना पक्राउ परेका छन् । प्रहरीले उनीहरुलाई मंगलबार पक्राउ गरेको हो ।

पक्राउ पर्नेहरूमा काठमाडौं कोटेश्वर बस्ने रामेछापका ३६ वर्षीय बिनोद कुमार कार्की र सिन्धुली घर भएका ४० वर्षीय लेखबिक्रम थापा तथा काठमाडौं मुलपानी बस्नेहरू रामेछाप घर भएका २८ वर्षीय मनोज खत्री, रामेछाप घर भएका २३ वर्षीय महेश खत्री, रामेछाप घर भएका २० वर्षीय मनिस खत्री, सिन्धुली घर भएका २८ वर्षीय गौरव तामाङ, सिन्धुपाल्चोक घर भएका २७ वर्षीय मोहन खड्का, सिन्धुपाल्चोक घर भएका १८ वर्षीय किशोर र काठमाडौं कागेश्वरी घर भएका ३५ वर्षीय सुमन नगरकोटी रहेका छन् ।

विशेष सूचनाको आधारमा काठमाडौं उपत्यका अपराध अनुसन्धान कार्यालयबाट खटिएको प्रहरीले कागेश्वरी मनोहरा नगरपालिका थलीस्थित बिनोद कुमार कार्कीले भाडामा लिई बसेको कोठामा तलासी गर्दा नक्कली खुकुरी रम, गोल्डेन ओक, फाईटर, सिग्नेचर, ३६५ ब्ल्याक, सगुन गोल्ड मदिरा, मदिरा बनाउन प्रयोग गर्ने समानहरु, चिनी–पानी मिश्रित तरल पदार्थ, विभिन्न रक्सीहरूको खाली बोतल, राजश्व अन्तशुल्कको स्टिकरहरु, लेवलिङ एवं प्याकेजिङ गर्न प्रयोग गरिने सामानलगायत अन्य विभिन्न सामग्रीहरूसहित उनीहरूलाई पक्राउ गरेको हो ।

उनीहरूले स्वदेशी तथा विदेशी ब्राण्डका विभिन्न गुणस्तरहिन नक्कली मदिराहरू बनाई कालोबजारी गर्ने गरेको, आन्तरिक राजश्वको अन्त शुल्कका नक्कली स्टिकरहरु प्रयोग गर्ने गरेको, नक्कली मदिरा संचालकहरूले उक्त स्वदेशी तथा विदेशी ब्राण्डका विभिन्न गुणस्तरहिन नक्कली मदिराहरू प्रचलित बजार दरभाउभन्दा कम मूल्यमा बेचबिखन गर्ने गरेको अनुसन्धानबाट खुल्न आएको छ । प्रहरीका अनुसार उनीहरूलाई थप अनुसन्धान तथा कारवाहीको लागि जिल्ला प्रहरी परिसर काठमाडौं पठाइएको छ ।