फ्रेन्ज कन्सल्टेन्सीमा प्रहरीको छापा सहित चारजना पक्राउ

काठमाडौँ । डिल्लीबजार काठमाडौँमा सञ्चालित रहेको फ्रेन्ज कन्सल्टेन्सीमा प्रहरीले छापा मारेको छ । जिल्ला प्रहरी परिसर काठमाडौँका एसएसपी दानबहादुर कार्कीले कन्सल्टेन्सीको आवरणका ‘किर्ते’ काम भइरहेको सुराकको आधारमा छापा मारेर चार जनालाई पक्राउ गरिएको बताए । पक्राउ पर्नेमा चितवनको राप्ती नगरपलिका–३ घर भएका ३३ वर्षीय निराजन उप्रेती, चितवनको भरतपुर महानगरपालिका–१० घर भएका उत्सव सुवेदी, २८ वर्षका निरज उप्रेती र दाङको तुलसीपुर घर भएका सन्दीप डाँगी रहेका छन् ।

प्रहरीले कन्सल्टेन्सीबाट बैंकले जारी गर्ने कागजात, मालपोत, भूमि व्यवस्था सहरकारी तथा गरिबी निवारण मन्त्रालयको छाप र त्रिवि शिक्षण अस्पतालको छाप पनि बरामद गरेको छ । साथै विभिन्न सरकारी कार्यालयका ६ थान छाप, सरकारको छाप लगाएका कागजातहरु र कम्यूटर बरामद गरेको एसएसपी कार्कीले जानकारी दिएका छन् । प्रहरीले आरोपीहरुविरुद्ध सरकारी छाप दस्तखत किर्ते मुद्दामा अनुसन्धान गरिरहेको बताएको छ ।