कालीदह नाकामा सुनसहित एकजना पक्राउ

काठमाडौं । सशस्त्र प्रहरी रुपन्देहीले दाङ घोराही नगरपालिका-१० का २१ वर्षिय हुमानन्द गिरीलाई करिब दुई केजी सुनसहित पक्राउ गरको छ । प्रहरीले गए राति रु. एक करोड ८५ लाख ६५ हजार तीन सय ५५ मूल्य बराबरको एक किलो ९६५ दशमलव तीन ग्राम सुनसहित उनलाई पक्राउ गरेको हो ।

नेपालबाट भारततर्फ जाँदै गर्दा बिशेष सुराकीका आधारमा लुम्बिनी सांस्कृतिक नगरपालिका अन्तर्गतको कालीदह नाकामा उनलाई पक्राउ गरिएको सशस्त्र प्रहरी उपरीक्षक दीपक थापाले जानकारी दिए । चेकजाँचका क्रममा गिरीले चलाएको बा१२च ३८२० नम्बरको कारबाट दुई वटा सुनको इँट्टा फेला परेको उनको भनाइ छ ।

कारमा फल्स बटम बनाई उक्त वस्तु ल्याइएको पाइएको छ र सुनमा स्वीट्जरल्याण्ड, एक किलो फाइन गोल्ड लेखिएको छ । आवश्यक कारबाहीका लागि भन्सार कार्यालयमा बुझाएको र थप अनुसन्धान भइरहेको प्रहरीले जनाएको छ ।