नेत्रज्योति संघ र डाक फाउन्डेसनबीच सम्झौता

काठमाडौं । नेपाल नेत्रज्योति संघ र अस्ट्रेलियाको डाक फाउन्डेसनबीच सम्झौता भएको छ । सन् २०२३ मा करिब आठ हजार जना आँखाका बिरामीको निःशुल्क शल्यक्रियाका लागि संघलाई अनुदान रकम उपलब्ध गराउनेसम्बन्धी सम्झौता भएको हो । सम्झौतापछि संघले विभिन्न अस्पताल तथा बाह्य कार्यक्रममार्फत आर्थिक अभावका कारण आँखाको उपचारबाट बञ्चित नागरिकको निःशुल्क आँखा उपचार गर्नेछ ।

सम्झौतापत्रमा संघका अध्यक्ष प्राडा चेतराज पन्त र फाउन्डेसनका संस्थापक डेभ रिकार्डले हस्ताक्षर गरेका छन् ।

संघ र फाउन्डेसनका बीचमा सन् २०१९ देखि निरन्तर सहकार्य भइरहेको र यसैको निरन्तरताको रूपमा निःशुल्क शल्यक्रियाको सम्झौता भएको हो । कोही पनि नागरिकले आर्थिक अभावकै कारण दृष्टिविहीन भएर बस्नु नपरोस् भनेर संघले विभिन्न दातृ निकायसँगको सहकार्यमा देशैभर निःशुल्क शिविर सञ्चालन गरिरहेको संघका महासचिव भरतबहादुर चन्दले बताए ।

डाक फान्डेसनको सहयोगमा अहिलेसम्म करिब पाँच लाख बिरामीको आँखा जाँच गरी ५२ हजार बिरामीको निःशुल्क शल्यक्रियासमेत गरिएको संघका कार्यक्रम व्यवस्थापक रञ्जन शाहले जानकारी दिए । अस्ट्रेलियन दम्पती डेभ रिकार्ड र केरी डिकार्डले आफ्नो व्यक्तिगत आयबाट सञ्चालन गरेको फाउन्डेसनले हाल विश्वका करिब १० देशका गरिबीको रेखामुनि रहेका नागरिकलाई विभिन्न स्वास्थ सेवा निःशुल्क प्रवाह गर्न अनुदान दिइरहेको छ । विश्वका पाँच लाख मानिसलाई ज्योतिको दोस्रो अवसर दिने लक्ष्य रहेको फाउन्डेसनका संस्थापक डेभ रिकार्ड बताउँछन् ।

सन् २०३० सम्ममा नेपालबाट उपचारपछि निको हुने अन्धोपनालाई निवारण गर्ने नेत्रज्योति संघको योजनामा डाक फाउन्डेसनले महत्वपूर्ण सहयोग पु-याइरहेको संघका कार्यकारी निर्देशक डा शैलेशकुमार मिश्रले जानकारी दिए । ‘अहिले पनि हाम्रो देशमा कतिपय नागरिकहरू आर्थिक अभावकै कारण आँखा उपचारबाट बञ्चित छन् । त्यस्ता नागरिकलाई सेवा प्रवाह गर्न डाक फाउन्डेसनजस्ता दातृ निकायको सहयोग महत्वपूर्ण छ’ मिश्रले भने ।