एचआईभी संक्रमित विभेदमा

काठमाडौं । समाजमा चेतना अभावले एचआईभी संक्रमित विभेदमा परेका छन् । एचआईभी संक्रमितहरूले आधारभूत सेवा तथा मौलिक हकको समेत उपभोग गर्न नसकेको राष्ट्रिय एचआईभी तथा एड्स महासंघ नेपालले जनाएको छ ।

महासंघका आयोजना अधिकृत राजेश्वरी प्रजापतिले एचआईभी संक्रमित भएकै कारण शिक्षा, स्वास्थ्य, सम्पत्तिलगायत मौलिक हकबाट बञ्चित हुनु परेको बताइन् । सहरी क्षेत्रमा भन्दा ग्रामीण भेगमा यो समस्या बढी भएको उनले बताइन् । महासंघले एचआईभी संक्रमण भएकै कारण जन्मदर्ता र नागरिकता पाउन समेत समस्या भएको बताएको छ । अहिलेसम्म ४३ जना बालबालिकको जन्मदर्ता समेत हुन सकेको छैन ।

महासंघका अनुसार नेपालमा एचआईभी संक्रमितको संख्या ३० हजार ३० जना छ । त्यसमध्ये २४ हजार दुई सय ३७ जनाले औषधी सेवन गर्ने गरेका छन् । सरकारले एचआईभी संक्रमितलाई सामान्य नागरिकसरह अधिकार प्रदान गरे पनि समाजमा विभेद कायमै रहेको महासंघका अध्यक्ष खगेन्द्र खड्काले बताए ।