सम्पत्ति शुद्धीकरणको चर्चा र चुनौती
बाबुकाजी कार्की २०७८, पुस २५ १२:३४ 
काठमाडौँ । सम्पत्ति शुद्धीकरणको चर्चा बेलाबखत सशक्तरूपमा उठ्ने गरे पनि नियमन त्यत्तिकै चुनौतीपूर्ण छ । सम्पत्तिको स्रोत उत्पत्ति र गन्तव्यलाई गोप्य राख्दै गैरकानुनीरूपमा आर्जित कालोधनलाई विभिन्न प्रकृतिका छदम कारोबार देखाई सम्पत्तिमा रूपान्तरण गरी शुद्ध एवं कानुनीरूपमा वैध आर्जितजस्तो बनाउने प्रक्रियालाई सम्पत्ति शुद्धीकरण भनिन्छ । सम्पत्ति शुद्धीकरण खासगरी चार चरणमा हुन्छ ।
प्रथम चरणमा अवैध रूपमा रकम संकलन गर्ने काम हुन्छ, दोस्रो चरणमा अवैध रूपमा कमाएको रकम कहीँ न कहीँ राख्ने काम गरिन्छ । जसअन्तर्गत आर्जित पैसालाई विभिन्न माध्यमले वित्तीय तथा बैंकिङ प्रणालीमा प्रवेश गराइन्छ । तेस्रो चरण रकमको तहकीकरण गरी बैंक तथा वित्तीय प्रणालीमा प्रवेश गरेको रकमलाई बैंकिङ क्रियाकलापमार्फत नै प्रयोगमा ल्याइन्छ । यसो गर्दा अनुसन्धान गर्ने निकायहरूको आँखा नपरोस् भनेर नपत्याउने ठाउँहरूमा कारोबार गरिन्छ ।
कारोबारका चरणहरू श्रृंखलाबद्घ हुन्छन् । चौथो चरणमा बैंकिङ प्रणालीमार्फत चलखेल गराएर जब उक्त रकम वैधानिकसरह मान्यता पाउँछ तब सो रकमलाई एकीकृत गरी औपचारिकरूपमा राज्यको वैधानिक अर्थतन्त्रभित्र प्रवेश गराइन्छ । यी चरणपश्चात् झट्ट हेर्दा यस्ता अवैध आर्जन वैध आर्जन गरेको धनजस्तो भान हुन्छ ।
सन १९८९ मा वित्तीय कारबाही कार्यदल (एफएटीएफ)को स्थापनापश्चात् सम्पत्ति शुद्धीकरणसम्बन्धी अपराधलाई गम्भीर प्रकृतिको आर्थिक अपराधको रूपमा परिभाषित गरी यसलाई नियन्त्रण गर्नुपर्ने आवश्यकतालाई विश्वव्यापीरूपमा स्वीकारिएको हो । सन २००१ पश्चात आतंकवादी क्रियाकलापमा वित्तीय लगानीलाई पनि समावेश गरियो ।
विश्वका एक सय ३३ भन्दा बढी राष्ट्रहरूमा सम्पत्ति शुद्धीकरण कानुन लागू भइसकेको छ । नेपालले सन २००२ मा एफएटीएफको क्षेत्रीय संस्था एसिया प्यासिफिक ग्रुप अन मनी लाउन्डरिङको सदस्यता प्राप्त गरेपछि सम्पत्ति शुद्धीकरण निवारण ऐन २०६४ तथा सम्पत्ति शुद्धीकरण निवारण नियमावली, २०६६ र सम्पत्ति शुद्धीकरण तथा आतंककारी क्रियाकलापमा वित्तीय लगानी निवारण रणनीति तथा कार्ययोजना (२०६८— २०७२) कार्यान्वयनमा आएको छ ।
नेपालमा सम्पत्ति शुद्धीकरणसम्बन्धी अपराधको सूचना बैंकिङ प्रणालीतर्फको नेपाल राष्ट्र बैंकअन्तर्गत रहेको वित्तीय जानकारी एकाइबाट र अन्यतर्फको नेपाल प्रहरीअन्तर्गतको केन्द्रीय अनुसन्धान ब्युरोका साथसाथै अन्य सरकारी स्रोतबाट र सर्वसाधारणहरूबाट समेत प्राप्त गरिन्छ । यसरी प्राप्त सूचना र सुराकीहरूको अनुसन्धान र तहकिकात गरी उक्त कसुर गरेको हो होइन भनी पत्ता लगाउने जिम्मेवारी र अधिकारसहित नेपाल सरकारको मिति २०६८/०३/१ को निर्णयानुसार सम्पत्ति शुद्धीकरण अनुसन्धान विभागको स्थापना भएको हो ।
विभागले सम्पत्ति शुद्धीकरण नियन्त्रणका सम्बन्धमा प्रवद्र्धनात्मक, निरोधात्मक र उपचरात्मक प्रकृतिका कार्यहरू गर्दै आएको भए पनि विद्यमान नीति नियमको समयानुकूल परिवर्तन तथा कार्यान्वयनमा फिका देखिएको छ । वर्तमान नीति नियमको असर ठूलाबडा तथा उच्च पदस्थ पदाधिकारीहरूको सम्पत्तिलाई निगरानी गरको पाइँदैन ।
सम्पत्ति शुद्धीकरण आर्थिक अपराधहरूमध्ये गम्भीर एक हो । यसले वित्तीय कानुनी राज्यको अवधारणालाई क्षयीकरण गर्छ । सरकार, राज्य व्यवस्था र वित्तीय प्रणालीप्रति नै यस अवधारणाले वितृष्णा पैदा गर्दछ । विशेषतः सम्पत्ति शुद्धीकरणले विदेशी विनिमयदर र ब्याजदरलाई विकृत बनाउँछ । ब्याजदर विकृत भएपछि देशमा बचत, लगानी र उत्पादनका सम्भावनाहरूमा प्रत्यक्षत प्रभाव पार्दछ । स्मरणीय छ सम्पत्ति शुद्धीकरणकर्ता पुँजीको सीमान्त उत्पादकत्व र ब्याजदरको सन्तुलित विन्दु खोज्दैन बरु उसको अवैध आर्जनलाई जसरी भए पनि वैध बनाउने प्रयास गर्दछ । यसले गर्दा सच्चा र इमान्दार लगानीकर्ता हतोत्साही हुन पुग्दछन् । त्यसैगरी सम्पत्ति शुद्धीकरणले देशको विनिमयदरमा सोझै नकारात्मक प्रभाव पार्दछ ।
त्यस्तो कार्यले अदृश्यरूपमा विदेशबाट पैसा आएर वा स्वदेशबाट बाहिर गएर स्थानीय बजारमा नेपाली मुद्राको माग बढ्ने घट्ने गर्दछ । जसले गर्दा आधिकारिक विनिमय दरलाई वास्तविक बनाइदिन्छ । यसरी विनिमयदर प्रभावित हुँदा आयत निर्यात समेत प्रभावित हुन्छ । समग्रमा सम्पत्ति शुद्धीकरणले पारदर्शिता घटाउने, आर्थिक स्थायित्व खलबलाउने, सरकारी निकाय र बैंक तथा वित्तीय संस्थाहरूको साख गुम्ने, मौद्रिक तथा व्यावसायिक अपचलन बढाउने, लगानी विकर्षण गर्ने, व्यापारघाटा बढाउने, पुँजी पलायन हुने र अन्ततोगत्वा अपराधीहरू शक्तिशाली बनी सम्पूर्ण समाज नै अपराधीकरणतर्फ उन्मुख हुन पुग्दछ ।
विकासका आधुनिक अवधारणासँगै सिर्जित यस्तो आर्थिक अपराधबाट सिंगो विश्व नै आक्रान्त हुँदै गएको छ । यसले विश्वमै सामाजिक, आर्थिक, नैतिक र राजनीतिक परिवेशलाई कलंकित र धराशायी बनाउँदै लगेको छ । यस्तो प्रचलन अमेरिकामा सन १९२० देखि आयकरको दायरामा भित्र नपरेको कपडा धुने व्यवसायलाई माध्यम बनाई सुरु भएको थियो । नेपालमा पनि सुशानको चुनौतीको रूपमा रहेको यस्तो अपराध बढ्दो क्रममा छ । आतंककारी कार्य, आतंकवादी व्यक्ति वा संगठनले पूर्ण वा आंशिकरूपमा प्रयोग गर्नेगरी प्रत्यक्ष वा परोक्षरूपले प्रदान गरिएको सम्पत्ति वा कोष र हातहतियार निमार्ण, ओसारपसार र प्रयोग गरिने लगानी समेतलाई सम्पत्ति शुद्धीकरण निवारणअन्तर्गत कारबाही गर्ने प्रावधान छ ।
नेपालको खुला सीमाना र प्रणालीगत कमजोरीका कारण सम्पत्ति शुद्धीकरणसम्बन्धी अपराधको जगजगी रहेको छ । मानव तस्करी, दुर्लभ वन्यजन्तु तथा वनस्पतीको अवैध ओसारपसार, कर छली, अवैध हातहतियार तथा खरखजनाको ओसारपसार, बैंकिङ कसुर, आम्दानीको गलत स्रोत उल्लेख, कर राजस्व छली, विदेशी विनिमय, हुण्डीमार्फत रकम स्थान्तरण, भ्रष्टाचारमा परिवार र नातागोताको प्रयोग, अपहरण फिरौती, धम्की, जबर्जस्ती चन्दा, घर जग्गा कारोबारमा देखिएका कसुर तथा घरजग्गाको कारोबारमा वास्तविकभन्दा धेरै कम वा बढी मूल्य उल्लेख आदि नेपालमा बढ्दै गएका उदयीमान अपराधका प्रकृतिहरू हुन् ।
बैंकिङ वित्त, घरजग्गा स्टक, विदेशी विनिमय, कर, भन्सार, अन्तशुल्क आदि नेपालमा सम्पत्ति शुद्धीकरण हुनसक्ने प्रमुख क्षेत्रहरू हुन् । अन्य मुलुकले जस्तै नेपालले पनि यसलाई निवारण गर्ने प्रयासस्वरूप विभिन्न नीतिगत, संस्थागत, कानुनी तथा प्रक्रियागत व्यवस्थालाई कार्यान्वयनमा ल्याएको छ । तर यी प्रयासहरू अपेक्षाकृत प्रभावकारी साबित हुन सकेको देखिँदैन । सम्पति शुद्धीकरण निवारण के किन र कसरी भन्ने सम्बन्धमा जनचासोलाई व्यापक र सशक्त बनाउन चेतनामूलक कार्यक्रम सञ्चालनको खाँचो देखिन्छ । यसले विद्यमान व्यवस्थामा सुधारको गुञ्जायसलाई औँल्याएको छ ।
प्रयाप्त कानुनी व्यवस्था, उपयुक्त सूचना प्रणाली, दृढ इच्छाशक्ति भएका निस्कलंक दक्ष मानवीयलगायत अन्य साधनस्रोतको व्यवस्था, कार्यान्वयनका लागि उपयुक्त संस्थागत संरचना, सही कार्य पद्धति, राष्ट्रिय क्षेत्रीय र अन्तर्राष्ट्रिय सहयोगको आदन प्रदान, सम्पत्ति शुद्धीकरण अनुसन्धान विभागको गठन, सम्पत्ति शुद्धीकरण निवारणसम्बन्धी कार्यविधि तर्जुमा, प्रशिक्षण एवं सीपको व्यवस्था, अन्तरनिकाय समन्वय तथा सूचना सञ्जालको स्थापना, नीति नियमहरूको कार्यान्वनमा प्रतिबद्धता आदि विद्यमान अवस्थमा सुधारका आधारभूत पक्ष हुन् ।
क्याटेगोरी : विचार / ब्लग
ताजा अपडेट
- तनहुँ बस दुर्घटनाः बस चालकको मृत्यु
- परिवार नियोजन सङ्घको केन्द्रीय अध्यक्षमा डा श्रेष्ठ निर्वाचित
- रवि लामिछानेविरुद्ध काठमाडौँबाट पक्राउ पुर्जी जारी
- राष्ट्रपतिसमक्ष नवनियुक्त राजदूतको शपथ
- रास्वपाले दोस्रो चरणको आन्दोलन चलाउने
- साइबर प्रविधिमा आधारित ठगीमा विद्यार्थी बढी संलग्नः राष्ट्र बैंक
- जानकी विवाह महोत्सवको निम्तो दिन मुख्यमन्त्रीको टोली अयोध्या प्रस्थान
- बीमा प्राधिकरण र एक्चुरियल सोसाइटीबीच सम्झौता
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया