रियाद, साउदीसँगको लडाइँमा हालैको तीव्रता आउनुमा हुथीहरूलाई इरानले प्रोत्साहन दिएको साउदी अरबले बिहीबार दाबी गरेको छ ।
विदेश मन्त्रालयका अधिकारीले इरानले उक्त समूहलाई निरन्तर हतियार र तालिम दिइरहेको पनि बताएका हुन् ।‘इरानले संयुक्त राष्ट्रसंघ सुरक्षा परिषद्का प्रस्तावहरूको उल्लंघन गर्दै हुथी लडाकूलाई निरन्तर हतियार, तालिम र समर्थन दिइरहेको छ’, विदेश मन्त्रालयका सार्वजनिक कूटनीतिसम्बन्धी उपमन्त्री डा. रायेद क्रिम्लीले भने, ‘हामीलाई लाग्छ कि द्वन्द्वको यस पछिल्लो चरणमा हुथीहरूको तीव्रता इरानबाट प्रोत्साहित छ ।’
साउदी अरब इरानसँग सम्पर्कमा रहिरहेको तर तेहरानले कुनै सहुलियत दिन तयार नदेखिएको जस्तो लाग्ने गरेको उनले बताए । ‘हामी इरानसँग प्रत्यक्ष सञ्चार जारी राखिरहेका छौँ’, क्रिम्लीले भने, ‘समग्रमा, अहिलेसम्म इरानीहरू समाधानका लागि आवश्यक सहुलियत दिन सक्षम देखिएका छैनन् ।’
अधिकारीले हुथीहरूमाथि पछिल्ला केही हप्तामा ओमानमा भेटघाट गर्न अस्वीकार गरेको आरोप पनि लगाए । दुवै पक्षबीच लडाइँ बढिरहेको बेला यस्तो भएको हो । ‘यस तीव्रताको सुरुवातमा हामीले उनीहरूलाई मस्कट, ओमानमा भेट्न आग्रह गरेका थियौँ तर उनीहरूले अस्वीकार गरे’, उनले थपे, ‘यो केही हप्ताअघि भएको अन्तिम सञ्चार थियो ।’
विश्वको सबैभन्दा ठूलो कच्चा तेल निर्यातकर्ता देश पछिल्ला केही दिनदेखि निरन्तर आक्रमणको शिकार बनिरहेको छ । यसमा रियादको अन्तर्राष्ट्रिय विमानस्थलमा भएको आक्रमण पनि समावेश छ जुन वर्षौंदेखिको सबैभन्दा घातक आक्रमण हो । हुथीहरूसँगको युद्ध नाटकीय रूपमा बढिरहेको छ । यमनको गृहयुद्ध जुलाईमा संयुक्त राष्ट्रसंघको मध्यस्थतामा भएको युद्धविराम भङ्ग भएपछि फेरि सुरु भएको थियो ।
