आर्थिक दैनिकका पत्रकार पोषकान्त पोखरेलको मोटरसाइकल दुर्घटनामा मृत्यु

आर्थिक दैनिक एप डाउनलोड गर्नुहोस्

प्रिमियम आर्थिक विश्लेषण, प्रत्यक्ष सेयर बजार डाटा र ताजा आर्थिक अपडेटहरू अहिले नै आफ्नो मोबाइलमा पाउनुहोस्।

छैन · चाडै आउँदैछ

Google Play

छैन · चाडै आउँदैछ

App Store

काठमाडौं । आर्थिक दैनिकमा कार्यरत पत्रकार पोषकान्त पोखरेलको मोटरसाइकल दुर्घटनामा परी मृत्यु भएको छ । पश्चिम नवलपरासीको रामग्राम नगरपालिका–२ स्थित सेतो पुलमा शुक्रबार भएको दुर्घटनामा ४२ वर्षीय पोखरेलको मृत्यु भएको हो । हुलाकी सडकखण्डमा पोखरेल सवार लु प्र ०१–००९ प ९६१९ नम्बरको मोटरसाइकललाई सु प्र ०१–००१ ख ३४९७ नम्बरको ट्रकले ठक्कर दिएको थियो । ट्रकको ठक्करबाट गम्भीर घाइते भएका पोखरेललाई उपचारका लागि जिल्ला अस्पताल लैजाँदै गर्दा बाटोमै मृत्यु भएको प्रहरीले जनाएको छ ।

प्रहरीका अनुसार दुर्घटनामा संलग्न ट्रक चालक कञ्चनपुरको लालझाडी गाउँपालिका–६ का २६ वर्षीय बन्धु रानालाई नियन्त्रणमा लिइएको छ । घटनाबारे थप अनुसन्धान भइरहेको प्रहरीले जनाएको छ ।पोखरेलको शव पोस्टमार्टमका लागि अस्पतालमा राखिएको छ ।

रूपन्देहीको तिलोत्तमा नगरपालिका–१३, भलवाडी निवासी पोखरेल लामो समयदेखि पत्रकारितामा सक्रिय थिए । उनी विगत दशकदेखि आर्थिक दैनिकका लागि रुपन्देही संवाददाताका रूपमा कार्यरत थिए । पोखरेलले ‘अग्नि परीक्षा’ नामक साप्ताहिक पत्रिका सञ्चालनसमेत गर्दै आएका थिए । उक्त पत्रिकाको सम्पादकको जिम्मेवारी पनि उनी आफैंले सम्हाल्दै आएका थिए । नेपाल पत्रकार महासंघ, रूपन्देही शाखाका सदस्यसमेत रहेका पोखरेलको निधनले पत्रकारिता क्षेत्रमा दुःख र शोकको वातावरण सिर्जना भएको छ । पोखरेलका श्रीमती र दुई छोरी छन् ।